Sabil-e-sajda-e-na-muKHtatam banate hue

sabil-e-sajda-e-na-muKHtatam banate hue
KHuda tak aae hain kya kya sanam banate hue

ghurur-e-ishq mein ek inkisar-e-faqr bhi hai
KHamida-sar hain wafa ko alam banate hue

tere KHayal ki rau hai ki koi mauj-e-tarab
guzar rahi hai ajab zer-o-bam banate hue

jabin-e-waqt pe sabt apna naqsh us ne kiya
dilon ke dagh charagh-e-haram banate hue

to kya zarur ki tahqir KHalq karte phiro
ek apna aks-e-ana muhtashim banate hue

guzarte hain kahan zindagi guzarti hai
bas ek rah ba-su-e-adam banate hue