صبا کی خاک نوردی سبو کی ویرانی

صبا کی خاک نوردی سبو کی ویرانی
تمہارے بعد ہوئی آرزو کی ویرانی

ترے بغیر میرے حوصلے زوال پذیر
ترے بغیر مری جستجو کی ویرانی

شمار عمر گریزاں حساب طاعت و زہد
وضو کی خانہ پری تھی لہو کی ویرانی

ہر ایک دشت پرانا سراب جاں کی طرح
ہر ایک شہر نیا آبرو کی ویرانی

تمہارے ساتھ سے میرے سخن کی شیرینی
تمہارے بعد مری گفتگو کی ویرانی

تمام رات سراب سفر کا دھڑکا تھا
تمام رات تھی اک ہاوہو کی ویرانی