Sare bhule bisron ki yaad aati hai

sare bhule bisron ki yaad aati hai
ek ghazal sab zaKHm hare kar jati hai

pa lene ki KHwahish se mohtat raho
mahrumi ki bimari lag jati hai

gham ke pichhe mare mare phirna kya
ye daulat to ghar baiThe aa jati hai

din ke sab hangame rakhna zehnon mein
raat bahut sannaTe le kar aati hai

daman to bhar jate hain ayyari se
dastar-KHwanon se barkat uTh jati hai

raat gae tak chalti hai Tw par film
roz namaz-e-fazr qaza ho jati hai