saneha ye bhi ek roz kar jaunga
waqt ki palki se utar jaunga
apne TuTe hue KHwab ki kirchiyan
teri aasuda aankhon mein bhar jaunga
raushni ke safine bulate rahen
sahil-e-shab se ho kar guzar jaunga
ajnabi wadiyan koi manzil na ghar
raste mein kahin bhi utar jaunga
mere dushman ke dil mein jo barson se hai
wo KHala bhi main ek roz bhar jaunga
doston se mulaqat ki sham hai
ye saza kaT kar apne ghar jaunga
Ghazal
Saneha ye bhi ek roz kar jaunga
Mazhar Imam