ruswa kiya shuur ko danai chhin li
jehl-e-KHirad ne aankhon se binai chhin li
sanson mein gunjti hui shahnai chhin li
shahron ne mujh se ganw ki purwai chhin li
is tarah bhi badalte hain nazron ke zawiye
KHud KHwab hi ne KHwab ki ranai chhin li
ruhon ki muflisi ne bahar-haal ek din
chehra-ainon se KHu-e-shanasai chhin li
honT aainon ke yunhi nahin hain sile hue
arzani-e-jamal ne goyai chhin li
fitrat ka ye tazad ajib-o-gharib hai
tanhai dene wale ne tanhai chhin li
Ghazal
Ruswa kiya shuur ko danai chhin li
Qaisar Siddiqi