raushni ka guzar makan mein kya
koi suraj hai saeban mein kya
jhuT par jhuT bole jate ho
kuchh kami rah gai hai shan mein kya
zikr mera zarur aaega
warna rakkha hai dastan mein kya
jo muKHalif the sath hain mere
kuchh kashish hai meri zaban mein kya
thak gae hain pukarne wale
koi rahta nahin makan mein kya
bolna hai to zor se bolo
phunkte ho hamare kan mein kya
Ghazal
Raushni ka guzar makan mein kya
Khawaja Javed Akhtar