ramz-ashna mile kai ahl-e-nazar mile
phir bhi ye justuju rahi koi bashar mile
aadil bhi ho rahim bhi ho karsaz bhi
sab kuchh to ho magar zara hum se nazar mile
inkar-e-sajda hai yahan kis ru-siyah ko
shayan-e-sajda bhi to magar koi dar mile
ye hai kamal-e-jahl ki mearaj-e-agahi
har lamha justuju hai kuchh apni KHabar mile
aish-e-gurez-pa ka tasawwur bhi miT gaya
gham aise mustaqil mile aur is qadar mile
Ghazal
Ramz-ashna mile kai ahl-e-nazar mile
Hari Chand Akhtar