رہتا ہے میرے دل میں ترا نور رات دن

رہتا ہے میرے دل میں ترا نور رات دن
اک شعلہ برق زن ہے سر طور رات دن

مانند مہر و ماہ حسینوں میں ہے فراق
کیوں ایک ایک سے نہ رہے دور رات دن

ہم نے ملائی آنکھ یہ منہ ہے سحاب کا
جاری ہے زخم چشم کا ناسور رات دن

تیرے لیے مثال مہ‌ و مہر و نجم و چرخ
پھرتے ہیں لنج و لنگ و کر و کور رات دن

کچھ غم فراق کا ہے نہ کچھ وصل کی خوشی
ہوں اس کے ذوق و شوق میں مسرور رات دن

منہ کس کا میرا ذکر کرے اس کے روبرو
رہتا ہے ورنہ خلق کا مذکور رات دن

خواہش ہر آئنہ ہے ادھر بھی نظر رہے
گو آئینہ نظر کے ہے منظور رات دن

دل میں جو بس رہی ہے کوئی نازنیں حسیں
پھرتی ہے میری آنکھوں میں اک حور رات دن

سوزش ہے داغ ہجر میں اس سے سوا وقارؔ
بھرتا ہوں جتنا مرہم کافور رات دن