rah-e-KHuda mein aalam-e-rindana mil gaya
masjid ko DhunDte the ki mai-KHana mil gaya
aaghaz-e-kaenat se jis ki talash thi
auraq-e-zindagi mein wo afsana mil gaya
ahl-e-junun ko tab kahan soz-e-husn ki
jalte hi shama KHak mein parwana mil gaya
dekha nigah-e-yas se jab gul-kade ka rang
har gul ki aaD mein koi virana mil gaya
ek ek zaban par meri rudad hai 'shakil'
apnon ke sath kya koi begana mil gaya
Ghazal
Rah-e-KHuda mein aalam-e-rindana mil gaya
Shakeel Badayuni