qarya-e-hairat mein dil ka mustaqar ek KHwab hai
ye zamin ek aaina hai ye nagar ek KHwab hai
tangi-e-auqat se khulti hai ek rah-e-najat
wusat-e-imroz-o-farda se udhar ek KHwab hai
ek subh-e-nur hai mere sitare ki niyam
aur meri be-tegh aankhon ki sipar ek KHwab hai
ye zamin-o-asman donon haqiqat hain magar
KHak par maujud hone ki KHabar ek KHwab hai
sans rukta hai to gul hoti hai sham-e-justuju
raat bhar bedar rahne ka samar ek KHwab hai
ek mauj-e-ab hai ek aks mein lipTi hui
ek mauj-e-rang se shir-o-shakar ek KHwab hai
Ghazal
Qarya-e-hairat mein dil ka mustaqar ek KHwab hai
Ghulam Husain Sajid