qalb-o-nazar ka sukun aur kahan dosto
ku-e-butan dosto ku-e-butan dosto
mera hi dil hai ki main phirta hun yun KHanda-zan
kam nahin pardes mein dil ka ziyan dosto
jin mein KHulus-e-wafa aur na shuur-e-sitam
mujh ko biThaya hai ye la ke kahan dosto
chaar ghaDi raat hai aao ki hans bol len
jaane sahar tak ho phir kaun kahan dosto
rabt-e-marasim ke baad tark-e-talluq ghalat
aag bujhane se bhi hoga dhuan dosto
lakh chhupo saya-e-gesu-e-shab-rang mein
mil nahin sakti magar gham se aman dosto
shair-e-'arshad' hun main shaer-e-fitrat hun main
miT nahin sakta mera nam-o-nishan dosto
Ghazal
Qalb-o-nazar ka sukun aur kahan dosto
Arshad Siddiqui