قدم قدم پہ عجب حادثات غم گزرے

قدم قدم پہ عجب حادثات غم گزرے
جہاں جہاں سے تری جستجو میں ہم گزرے

غم حیات کو لے کر جدھر سے ہم گزرے
ہجوم حادثہ نو بہ نو بہم گزرے

نہ راس آئے مری زندگی مجھے اے دوست
کبھی گراں جو مرے دل پہ تیرا غم گزرے

قدم قدم پہ ہوا امتحان ہوش و خرد
خدا کا شکر کہ دامن بچا کے ہم گزرے

نظر میں رقص کناں ہے تصور رخ دوست
یہ کہہ دو باد صبا سے دبے قدم گزرے

جبیں جھکے تو سمٹ آئے آستان حبیب
وہ سجدہ کیا جو بہ قید در حرم گزرے

ملی جہاں سے متاع خوشی زمانے کو
ہم اس مقام سے ماہرؔ بہ چشم نم گزرے