phul is KHak-dan ke hum bhi hain
muddai do jahan ke hum bhi hain
bahte dhaare pe hai qayam apna
sath mauj-e-rawan ke hum bhi hain
kah raha hai sukut-e-lala-o-gul
zaKHm-KHurda zaban ke hum bhi hain
dur rahte hain kyun jahan wale
rahne wale jahan ke hum bhi hain
sath misl-e-ghubar ho lenge
muntazir karwan ke hum bhi hain
'saif' ye chashmaken ye rang-e-bahaar
kya isi gulsitan ke hum bhi hain
Ghazal
Phul is KHak-dan ke hum bhi hain
Saifuddin Saif