phire hain dhun mein teri hum idhar udhar tanha
tujhe talash kiya hai nagar nagar tanha
hamare sath sabhi hain magar koi bhi nahin
hum anjuman mein hain baiThe hue magar tanha
gawah hain rah-e-shauq-o-talab ke sannaTe
kiya hai hum ne ye sabr-azma safar tanha
chale gae hain na-jaane kahan sharik-e-safar
mujhe hayat ki rahon mein chhoD kar tanha
bahut dinon se nahin tu rafiq-e-dida-o-dil
bahut dinon se akela hai dil, nazar tanha
bhulane wale kabhi tu ne ye bhi socha hai
tere baghair hai kab se tera 'zafar' tanha
Ghazal
Phire hain dhun mein teri hum idhar udhar tanha
Zafar Akbarabadi