Patthar ko pujte the ki patthar pighal paDa

patthar ko pujte the ki patthar pighal paDa
pal bhar mein phir chaTTan se chashma ubal paDa

jal thal ka KHwab tha ki kinare Dubo gaya
tanha kanwal bhi jhil se bahar nikal paDa

aaine ke visal se raushan hua charagh
par lau se is charagh ki aaina jal paDa

guzra guman se KHat-e-faramoshi-e-yaqin
aur aaine mein silsila-e-aks chal paDa

mat puchhiye ki kya thi sada wo faqir ki
kahiye sukut-e-shahr mein kaisa KHalal paDa

baqi rahunga ya nahin socha nahin 'said'
apne madar se yunhi ek din nikal paDa