panjon ke bal khaDe hue shab ki chaTan par
naKHun se ek KHarash laga aasman par
barson darun-e-sina sulagna hai phir hamein
lagta hai qufl-e-habs hawa ke makan par
ek dhaD hai ki chaaron taraf se sunai de
girdab-e-chashm ban gain aankhen machan par
maujud bhi kahin na kahin iltawa mein hai
jo hai nishan par wo nahin hai nishan par
us mein kamal us ki KHabar-saziyon ka hai
khata hun main fareb jo sach ke guman par
sarkash ko nisf umr ka ho lene dijiye
bik jaega kisi na kisi ki dukan par
Ghazal
Panjon ke bal khaDe hue shab ki chaTan par
Aftab Iqbal Shamim