pahle si ab baat kahan hai
wo din aur wo raat kahan hai
baaten jaise patjhaD patjhaD
sochon ki baraat kahan hai
sare mausam ek hue hain
wo rut wo barsat kahan hai
us ka chehra jaise sarson
aankhon mein wo baat kahan hai
ek shab main ne hi puchha tha
ai rab teri zat kahan hai
qarya qarya jo lahraya
wo parcham wo hat kahan hai
main baadal tu sahra 'rizwi'
tera mera sat kahan hai
Ghazal
Pahle si ab baat kahan hai
Hasan Rizvi