nibhegi kis tarah dil sochta hai
ajab laDki hai jab dekho KHafa hai
ba-zahir hai use bhi pyar waise
dilon ke bhed se waqif KHuda hai
ye tanhai ka kala sard patthar
isi se umr-bhar sar phoDna hai
magar ek baat donon jaante hain
na kuchh us ne na kuchh hum ne kaha hai
nahin mumkin agar sath umr-bhar ka
ye pal-do-pal ka milna kya bura hai
ghane jangal mein jaise sham utre
koi yun 'jafari' yaad aa raha hai
Ghazal
Nibhegi kis tarah dil sochta hai
Fuzail Jafri