nazar se dur hote ja rahe hain
sarapa nur hote ja rahe hain
jinhen badnam karna chahte ho
wahi mashhur hote ja rahe hain
hum aaghaz-e-safar se pahle hi kyun
thakan se chur hote ja rahe hain
baDhi hai raushni tahzib-e-nau ki
makan be-nur hote ja rahe hain
har ek apna janaza Dho raha hai
sabhi mazdur hote ja rahe hain
khile the phul zaKHmon ke jo ek din
wo ab nasur hote ja rahe hain
Ghazal
Nazar se dur hote ja rahe hain
Khawaja Javed Akhtar