نیا روشن صحیفہ دکھ رہا نئیں

نیا روشن صحیفہ دکھ رہا نئیں
خجستہ کوئی لہجہ دکھ رہا نئیں

تری سرگوشیوں کا نرم سایہ
لگایا زور سارا دکھ رہا نئیں

یہیں رکھا تھا خوابوں کے کنارے
ترا انمول تحفہ دکھ رہا نئیں

دبا کر دل میں جو رکھا تھا شعلہ
بہت میں نے کریدا دکھ رہا نئیں

تھکن نظروں پہ طاری ہو رہی ہے
نہ جانے کیوں وہ چہرا دکھ رہا نئیں

گھنے جو پیڑ تھے سب کٹ گئے کیا
کہاں ہے بہتا دریا دکھ رہا نئیں

جسے چھو کر گھٹا گانے لگی تھی
فلک پر وہ ستارا دکھ رہا نئیں

المیہ یہ نہیں تو کیا ہے ساجدؔ
جو تھا ہم زاد میرا دکھ رہا نئیں