Naujawanon se tahi paya kanar-e-pir ko

naujawanon se tahi paya kanar-e-pir ko
is kaman mein umr bhar hum ne na dekha tir ko

tirchhi nazron se na dekho aashiq-e-dil-gir ko
kaise tir-andaz ho sidha to kar lo tir ko

mar Dala DhunDh kar zalim ne mujh naKHchir ko
chashm kya sufar ke badle mili thi tir ko

hun main diwana meri taswir bhi tinke chune
kahruba ke rang se khincho meri taswir ko

tu na bose de saka lekin tere diwane ne
sar diya shamshir ko aur dast-o-pa zanjir ko

paDti hai tere makan par yar jo har ek ki aankh
gard-e-daman-e-nigah mangwai thi tamir ko

hai zaban ki saf jumbish misra-e-barjasta mein
yar KHush-taqrir kahte hai meri tahrir ko

haal us ghaflat-kade ka tha ayan roz-e-alast
KHwab dekha baad pahle sun liya tabir ko

paD gae hain saikDon chhaale jo ai KHunKHar-e-KHalq
kis ke KHun-e-garam se tu ne bhara shamshir ko

tu hai wo qatil ki tera wasf karne ke liye
munh mila zaKHmon ko mere aur zaban shamshir ko

hum wo hain farhad ai shirin agar rakkhen qadam
dudhiya patthar se jari kar den ju-e-shir ko

daman us gul ka jo aTka phir ke dekha naz se
de ab ai bulbul duaen KHar-e-daman-gir ko

ja ke Thahri ustuKHan par jab lagai tu ne tegh
kyun na ai qatil huma kahiye tere shamshir ko

hath mein wahshi nahin ata to atfal-e-hasin
khinchte phirte hain patthar par meri taswir ko

panw par dushman gire to jaan fikr-e-sar mein hai
mat samajh be-wajh pa-e-shama par gul-gir ko

barha bijli girai shoala-e-awaz ne
lan-tarani ki sada kahiye teri taqrir ko

pisti hai mehndi chaman mein dekhna raftar-e-yar
phul munh se jhaDte hain sunna zara taqrir ko

apne ashkon ke sabab dariya rawan har ghar mein hai
hath aain machhliyan ghar baiThe mahi-gir ko

aasman ke par guzri dil ne aisi aah ki
apne tarkash ne kaman ki tarah phenka tir ko

kohkan tujh se na pinhan ho saka asrar-e-ishq
hum chhupate ustuKHan ki tarah ju-e-shir ko

bahr-e-istiqbaal jaun mein kai tir aap se
wo nishana hun jo aate dekhun us ke tir ko

ho ke laghar tir ki manind chhuTe ai 'wazir'
kahiye ab KHana kaman ka KHana-e-zanjir ko