ننگ احساس ہے اندوہ غریب الوطنی

ننگ احساس ہے اندوہ غریب الوطنی
کم نہیں گرد رہ شوق کی سایہ فگنی

آدمی ہوتا ہے خود اپنے ہی تیشے کا شکار
کوئی آسان نہیں مشغلۂ کوہ کنی

پرتو رخ سے ترے کس کو نہیں حیرانی
اشک آئینہ ہوئی ہے تری سیمیں بدنی

سنبلستاں ہیں ترے گیسوئے پر خم کے اسیر
حسن قامت ہے ترا نازش سرو چمنی

اپنے جامے میں سماتی نہیں پھولوں کی بہار
دل میں کانٹوں کے کھٹکتی ہے یہ گل پیرہنی

دیکھ میری نگہ شوق کی منظر تابی
محو حیرت ہے ترے حسن کی آئینہ تنی

کیا کوئی گوش بر آواز ہوا ہے آصفؔ
لب کشائی پہ ہے مجبور مری کم سخنی