Nahin ki apni tabahi ka raaz ko gham hai

nahin ki apni tabahi ka 'raaz' ko gham hai
tumhaari zahmat-e-ahd-e-karam ka matam hai

nisar-e-jalwa dil-o-din zara naqab uTha
wo ek lamha sahi ek lamha kya kam hai

kisi ne chaak kiya hai gulon ka pairahan
shua-e-mehr tujhe e'timad-e-shabnam hai

qaza ka KHauf hai achchha magar is aafat mein
ye moajiza bhi ki hum ji rahe hain kya kam hai

wo raqs-e-shoala wo soz-o-gudaz-e-parwana
jidhar charagh hain raushan ajib aalam hai

hudud-e-dair-o-haram se guzar chuka shayad
ki ab ijazat-e-sajda hai aur paiham hai

shamim-e-ghuncha-o-gul rang-e-lala naghma-e-mauj
tere jamal ki jo sharh hai wo mubham hai

latafaton se zamana bhara paDa hai magar
meri nazar ki zarurat se kis qadar kam hai

fareb dil ne mohabbat mein khae hain kya kya
har ek fareb par ab tak yaqin-e-mohkam hai

meri nigah kahan tak jawab de aaKHir
teri nigah ka har har sawal mubham hai

abhi to apni nigahon ke iltifat ko rok
abhi to manzar-e-hasti tamam mubham hai