nae jahanon ka ek istiara kar ke lao
badan ki KHak uThao sitara kar ke lao
wagarna ishq mein ek aanch ki kami hogi
ye dil hai jao ise para-para kar ke lao
tumhaare pas hi hum KHud ko chhoD aae hain
kabhi tum aao to hum ko hamara kar ke lao
hawas ke gahre samundar se hain ghire hue hum
hamare samne KHud ko kinara kar ke lao
tamam bichhDe huon ko milao aaj ki raat
tamam khoe huon ko ishaara kar ke lao
Ghazal
Nae jahanon ka ek istiara kar ke lao
Salim Saleem