na sanam-kadon ki hai justuju na KHuda ke ghar ki talash hai
mere dil mein bhar de jo bijliyan mujhe us nazar ki talash hai
hain bahut se aise bhi rahzan jo milenge KHizr ke bhes mein
koi un se kah de ye ham-safar jinhen rahbar ki talash hai
tujhe chand roza KHushi mili to mila mujhe gham-e-daimi
wo teri nazar ki talash thi ye meri nazar ki talash hai
meri rah ye teri rah wo mera sath tujh se nibhega kya
ki mujhe hai dard ki justuju tujhe chaaragar ki talash hai
Ghazal
Na sanam-kadon ki hai justuju na KHuda ke ghar ki talash hai
Fazil Ansari