na puchh kab se ye dam ghuT raha hai sine mein
ki maut ka sa maza aa raha hai jine mein
na jaane kyun ye talatum Dubo nahin deta
ki naKHuda bhi nahin ab mere safine mein
qadam qadam pe bachaya hai Thokaron se magar
KHarash aa hi gai dil ke aabgine mein
mahak rahi hai saba subh se na jaane kyun
naha ke aai hai shayad tere pasine mein
'shamim' sahil o kashti se kuchh umid na rakh
koi waqar nahin is tarah se jine mein
Ghazal
Na puchh kab se ye dam ghuT raha hai sine mein
Shamim Jaipuri