نہ منزل ہے نہ منزل کا نشاں ہے

نہ منزل ہے نہ منزل کا نشاں ہے
ہمارا کارواں پھر بھی رواں ہے

اسی ڈالی پہ اپنا آشیاں ہے
تڑپتی جس جگہ برق تپاں ہے

ہوئی ہیں کارگر غیروں کی چالیں
ترے لب پر نہیں ہے اب نہ ہاں ہے

رہے صیاد ہر دم جس چمن میں
وہاں غم کی حکایت جاوداں ہے

سرور و نغمہ ہیں اب کل کی باتیں
یہاں تو اب فقط آہ و فغاں ہے

انہیں کیوں رنج ہو جور و ستم پر
ستمرانی تو خوئے مہوشاں ہے

نہیں انساں کی قیمت کوئی رفعتؔ
پرانے دور کی بات اب کہاں ہے