نہ خون دل ہے نہ مے کا خمار آنکھوں میں

نہ خون دل ہے نہ مے کا خمار آنکھوں میں
بسی ہوئی ہے تمہاری بہار آنکھوں میں

پھری ہیں پتلیاں بیگانہ وار آنکھوں میں
چھپا ہوا ہے کوئی پردہ دار آنکھوں میں

امید جلوۂ دیدار بعد مرگ کہاں
بھری ہے یاس نے خاک مزار آنکھوں میں

دیے بغیر ترے باغ میں گلوں نے داغ
چبھوئے نرگس شہلا نے خار آنکھوں میں

الٰہی دیدۂ حیراں کھلا نہ رہ جائے
ٹھہر نہ جائے کہیں انتظار آنکھوں میں

وہ رونے والا ہوں شعلہؔ کہ بعد مرگ مرا
بنائیں مردم دیدہ مزار آنکھوں میں