na jaane jae kahan tak ye silsila dil ka
wo mil bhi jae to milta nahin sila dil ka
baras rahi thin bahaaren taras rahi thi zamin
safar tamam hua phul kab khila dil ka
kahan hai wo shah-KHubi kahan daricha-e-shab
gae wo din ki samaat mein tha gila dil ka
wahi KHarabi-e-jaan ka sabab bhi hai lekin
qarar-e-jaan hai ki ye hai muamla dil ka
use fusun-gar o be-mehr main nahin kahta
firaq-e-yar ka bais hai fasla dil ka
talash usi ki musalsal usi ko pa kar bhi
zamin se ta-ba-falak hai ye mashghala dil ka
kisi tilism-e-hijabaat mein koi gham hai
bhaTak raha hai KHayalon mein qafila dil ka
Ghazal
Na jaane jae kahan tak ye silsila dil ka
Syed Amin Ashraf