نہ ہوں گے ہم تو یہ رنگ گلستاں کون دیکھے گا

نہ ہوں گے ہم تو یہ رنگ گلستاں کون دیکھے گا
بہاروں سے ہی تخریب بہاراں کون دیکھے گا

سر محشر جفاؤں کی شکایت بر محل لیکن
پھر ان معصوم نظروں کو پشیماں کون دیکھے گا

بجا ہے لالہ و گل کی تباہی کا تصور بھی
مگر یہ منظر محشر بداماں کون دیکھے گا

مجھے تسلیم ہے قید قفس سے موت بہتر ہے
نشیمن پر ہجوم برق و باراں کون دیکھے گا

حسیں تعبیر مستقبل سہی اس کی مگر انورؔ
نئے فتنوں کا اب خواب پریشاں کون دیکھے گا