مصیبتیں تو اٹھا کر بڑی بڑی بھولے

مصیبتیں تو اٹھا کر بڑی بڑی بھولے
مگر فراق کی ایذا نہ اک گھڑی بھولے

نہ ہوگی اس لب رنگیں کی آب و تاب نصیب
نہ اپنے رنگ پہ پھولوں کی پنکھڑی بھولے

کسی نے پیار سے باہیں گلے میں ڈال جو دیں
تمام ہجر کے صدمے ہم اس گھڑی بھولے

ابھی وہ یاد ہیں ساماں ہمیں اسیری کے
ابھی نہ طوق نہ بیڑی نہ ہتھ کڑی بھولے

تمہیں جو دیکھ لیا غم غلط ہوا اپنا
تمہیں جو پا گئے سب رنج اس گھڑی بھولے

بری بلا ہے یہ چشم سیاہ کی گردش
اسے جو دیکھ لے آہو تو چوکڑی بھولے

گری تھی شیخ کی تسبیح میکدے میں رات
خبر نہیں کہ کہاں نشے میں چھڑی بھولے

حفیظؔ وہ دم رخصت یہ کہتے جاتے ہیں
کہ میری یاد نہ دل سے کوئی گھڑی بھولے