مشکل کو سمجھنے کا وسیلہ نکل آتا

مشکل کو سمجھنے کا وسیلہ نکل آتا
تم بات تو کرتے کوئی رستہ نکل آتا

گھر سے جو مرے سونا یا پیسہ نکل آتا
کس کس سے مرا خون کا رشتہ نکل آتا

میرے لئے اے دوست بس اتنا ہی بہت تھا
جیسا تجھے سوچا تھا تو ویسا نکل آتا

میں جوڑ تو دیتا تری تصویر کے ٹکڑے
مشکل تھا کہ وو پہلا سا چہرہ نکل آتا

بس اور تو کیا ہونا تھا دکھ درد سنا کر
یاروں کے لئے ایک تماشہ نکل آتا

ایسا ہوں میں اس واسطے چبھتا ہوں نظر میں
سوچو تو اگر میں کہیں ویسا نکل آتا

اچھا ہوا پرکھا نہیں عنبرؔ کو کسی نے
کیا جانیے کیا شخص تھا کیسا نکل آتا