منہ زور آرزوؤں کی بے مہریاں نہ پوچھ

منہ زور آرزوؤں کی بے مہریاں نہ پوچھ
بیگانہ ہو رہی ہیں یہ لا کر کہاں نہ پوچھ

فہرست محسنوں کی نہایت طویل ہے
مجھ سے مری تباہیوں کی داستاں نہ پوچھ

مجھ کو پناہ دی نہ ترے غم نے بھی کبھی
میں دے رہا ہوں کتنے غموں کو اماں نہ پوچھ

ہر زخم چند زخموں کی کرتا ہے پرورش
کیسے سدا بہار ہے یہ گلستاں نہ پوچھ

دشت وفا کی وسعتوں کو پا سکا ہے کون
گم کس قدر ہوئے ہیں یہاں کارواں نہ پوچھ

وابستہ موڑ موڑ سے ہیں کتنے حادثات
یہ قتل گاہ ہے کہ دیار بتاں نہ پوچھ