mujh tak nigah aai jo wapas palaT gai
phaila jo mera shahr to pahchan ghaT gai
main chup raha to aankh se aansu ubal paDe
jab bolne laga meri aawaz phaT gai
is ka nahin hai ranj ki taqsim ghar hua
phulon bhari jo bel thi aangan mein kaT gai
jine ki KHwahishon ne sabhi zaKHm bhar diye
aaankhon se ashk mez se taswir haT gai
dast-e-bahaar-e-rang ne KHushbu bikheri thi
phir apne aap phul se titli lipaT gai
manzar jo chahta hun wahi dekhta hun main
main kya karunga 'shaz' jo ye dhund chhaT gai
Ghazal
Mujh tak nigah aai jo wapas palaT gai
Zakariya Shaz