mubarak saqi-e-mastan mubarak
farogh-e-majlis-e-rindan mubarak
jabin-e-shauq ke sajdon pe sajde
tujhe sang-e-dar-e-jaanan mubarak
tajalli-e-jamal-e-ru-e-jaanan
tujhe ai dida-e-hairan mubarak
ada-e-dilbari o dil-nawazi
tujhe ai KHusraw-e-KHuban mubarak
rida-e-KHwajgi taj-e-wilayat
tumhein ai murshid-e-dauran mubarak
kisi ke zaKHm-ha-e-dil ko ya-rab
kisi ki jumbish-e-mizhgan mubarak
dar-e-'waris' pe hai 'bedam' ka bistar
teri jannat tujhe rizwan mubarak
Ghazal
Mubarak saqi-e-mastan mubarak
Bedam Shah Warsi