KHub the we din ki hum tere giraftaron mein the

KHub the we din ki hum tere giraftaron mein the
gham-zadon andoh-ginon zulm ke maron mein the

dushmani jaani hai ab to hum se ghairon ke liye
ek saman sa ho gaya wo bhi ki hum yaron mein the

mat tabaKHtur se guzar qumri hamari KHak par
hum bhi ek sarw-e-rawan ke naz-bardaron mein the

mar gae lekin na dekha tu ne udhar aankh uTha
aah kya kya log zalim tere bimaron mein the

shaiKH-ji mindil kuchh bigDi si hai kya aap bhi
rindon bankon mai-kashon aashufta dastaron mein the

garche jurm-e-ishq ghairon par bhi sabit tha wale
qatl karna tha hamein hum hi gunahgaron mein the

ek raha mizhgan ki saf mein ek ke TukDe hue
dil jigar jo 'mir' donon apne gham-KHwaron mein the