میرا شاہد وہ ہمیں عیار آتا ہے نظر

میرا شاہد وہ ہمیں عیار آتا ہے نظر
ہم کو ہم پاتے نہیں جب یار آتا ہے نظر

کثرت شوق محبت میں مجھے ہر طرح سے
جس طرف دیکھوں رخ دل دار آتا ہے نظر

جان کا دھوکا ہمیں ہوتا ہے راہ عشق میں
مرگ کا ہر ایک دم آثار آتا ہے نظر

داغ ہجراں کے سوا لایا نہ کوئے یار سے
جو کوئی اس راہ کا بیمار آتا ہے نظر

پا برہنہ سینہ بریاں ہے تن عریاں وہی
جو کہ اس کا عاشق سرشار آتا ہے نظر

راہ سے دیر و حرم کی ہے جو کوئے یار میں
ہے وہی دیں دار گر کفار آتا ہے نظر

بعد مدت گردش تسبیح سے مسکیںؔ ہمیں
دانۂ تسبیح میں زنار آتا ہے نظر