مہربانی کو تری عارض تاباں سمجھے

مہربانی کو تری عارض تاباں سمجھے
روٹھ جانے کو خم کاکل پیچاں سمجھے

صبح خنداں کو مآل شب ہجراں سمجھے
شب کو تنویر کا اک عکس پریشاں سمجھے

زیست آشفتگیٔ گور غریباں سمجھے
موت کو سلسلۂ عمر گریزاں سمجھے

شوخ کرنوں کو دل سینہ فگاراں سمجھے
کہکشاؤں کو حسیں شہر نگاراں سمجھے

حرم و دیر نہ جلوہ گہ جاناں سمجھے
کچھ نہ سمجھے یہی اے گردش دوراں سمجھے

کچھ سمجھ پائے نہ احباب کے سمجھانے سے
وقت نے پوچھا کہ سمجھے تو کہاں ہاں سمجھے

صاف دل سادہ مزاج ایسی طبیعت پائی
ہم تو واعظ کو بھی اک بندۂ یزداں سمجھے

جس کو کہتے ہیں نسیم آج وہ ہے باد سموم
اور کبھی فصل خزاں کو بھی بہاراں سمجھے

پھوٹ کر بہنے لگے آنکھ سے نالہ شب ہجر
اور ہم سایے اسے نعمت باراں سمجھے

رنگ لایا ہے گلستاں کی تمناؤں کا خوں
ہم بڑی دیر میں مفہوم بہاراں سمجھے