مست نظروں کا التفات نہ پوچھ

مست نظروں کا التفات نہ پوچھ
جھوم اٹھی دل کی کائنات نہ پوچھ

اپنی نظروں کی کیفیات نہ پوچھ
مسکرا دی مری حیات نہ پوچھ

عشق میں ہر قدم ہے اک منزل
راہ الفت کی مشکلات نہ پوچھ

میں ہوں اور آپ کا تصور ہے
اب مری رونق حیات نہ پوچھ

جیسے ہر لحظہ دیکھتے ہو مجھے
مری مشق تصورات نہ پوچھ

حرف مطلب زباں پہ لا نہ سکا
دل میں اب تک ہے دل کی بات نہ پوچھ

ہجر کا حال کیا بتائیں وقارؔ
کیسے دن گزرا کیسے رات نہ پوچھ