masarraton ki saaton mein iKHtisar kar liya
hayat-e-gham ko hum ne aur sazgar kar liya
qasam jab us ne khai hum ne e'tibar kar liya
zara si der zindagi ko KHush-gawar kar liya
wo aaj chahte the baat kuchh baDhe magar wo hum
ki baat baat par sukut iKHtiyar kar liya
kaho ki mehr-e-subh-tab aae ho ke be-naqab
koi bas aa chuka kisi ka intizar kar liya
qadam qadam pe hadse qadam qadam pe inqilab
hamein to dekho zindagi ka e'tibar kar liya
Ghazal
Masarraton ki saaton mein iKHtisar kar liya
Mahshar Inayati