Masalon ki bhiD mein insan ko tanha kar diya

masalon ki bhiD mein insan ko tanha kar diya
irtiqa ne zindagi ka zaKHm gahra kar diya

DeDh neze par Tange suraj ki aankhen noch lo
be-sabab dahshat-zada mahaul paida kar diya

fikr ki la-markaziyat jagti aankhon mein KHwab
ham-KHayali ne zamane bhar ko apna kar diya

ek shajar ko jism ki nam sabz-gahon ki talash
aur is tahrik ne jangal ko suna kar diya

KHun ki surKHi safedi ki tarah mahw-e-safar
kuchh nae rishton ne har rishte ko ganda kar diya

ek kiran tasKHir-e-kul ki samt tha pahla qadam
aag ugalti aandhiyon ne hum ko andha kar diya