masafaten kab guman mein thin safar se aage
nikal gae apni dhun mein us ke nagar se aage
shajar se ek umr ki rifaqat ke silsile hain
nigah ab dekhti hai barg o samar se aage
ye dil shab o roz us ki galiyon mein ghumta hai
wo shahr jo bas raha hai dasht-e-nazar se aage
KHajil KHayalon ki bhiD hairat se tak rahi hai
guzar gaya rah-raw-e-tamanna kidhar se aage
tilism-e-aks-o-sada se nikle to dil ne jaana
ye harf kuchh kah rahe hain arz-e-hunar se aage
nisar un saaton pe sadiyon ke sahar 'ali'
jiye hain jin ke jilo mein sham o sahar se aage
Ghazal
Masafaten kab guman mein thin safar se aage
Jaleel u0027Aaliu0027