میں سوزش غم دوراں سے یوں جلا خاموش
کہ جیسے بزم میں جلتا ہو اک دیا خاموش
یہ اور بات کہ ہونٹوں پہ لفظ بکھرے تھے
مگر تھا بولنے والوں کا مدعا خاموش
ابھی نہ چھیڑئیے خوابیدہ موسموں کا مزاج
ابھی ہے رات کے آنچل میں ہر فضا خاموش
مری سرشت میں خاموشیوں کا زہر نہ گھول
نہ رہ سکے گا مرا ذوق حق نوا خاموش
بدن کی قید میں چیخیں نہ گھٹ کے مر جائیں
سسکتے کرب کو کیوں تم نے کر دیا خاموش
لہکتی آنکھ دھڑکتے دلوں کے پاس نہ لا
گزر نہ جائے کہیں کوئی حادثا خاموش
ہر ایک سمت ہے بکھرا ہوا سکوت آزرؔ
ادھر ہیں دیوتا پتھر ادھر خدا خاموش
غزل
میں سوزش غم دوراں سے یوں جلا خاموش
مشتاق آذر فریدی