main lipaTta raha hun KHaron se
tum ne puchha nahin bahaaron se
chandni se sahab-paron se
ji bahalta hai yaadgaron se
aa mere chand raat suni hai
baat banti nahin sitaron se
manzil-e-zindagi hai kitni dur
puchh leta hun rahguzaron se
baat jab bhi chhiDi mohabbat ki
KHamushi bol uThi mazaron se
ek bhi aaftab ban na saka
lakh TuTe hue sitaron se
sham-e-gham bhi guzar gai hai 'zafar'
khelte khelte ghubaron se
Ghazal
Main lipaTta raha hun Khaaron se
Yusuf Zafar