main jism o jaan ke khel mein bebak ho gaya
kis ne ye chhu diya hai ki main chaak ho gaya
kis ne kaha wajud mera KHak ho gaya
mera lahu to aap ki poshak ho gaya
be-sar ke phir rahe hain zamana-shanas log
zinda-nafas ko ahd ka idrak ho gaya
kab tak lahu ki aag mein jalte rahenge log
kab tak jiyega wo jo ghazabnak ho gaya
zinda koi kahan tha ki sadqa utarta
aaKHir tamam shahr hi KHashak ho gaya
lahje ki aanch rup ki shabnam bhi pi gai
'ajmal' gulon ki chhanw mein namnak ho gaya
Ghazal
Main jism o jaan ke khel mein bebak ho gaya
Kabir Ajmal