میں جس خواب میں رہتا ہوں پہلے اس خواب تک آیا وہ

میں جس خواب میں رہتا ہوں پہلے اس خواب تک آیا وہ
پھر اس خواب سے دل کے رستے میری کتاب تک آیا وہ

مے خانے تک جانے کا پھر ہوش بھلا کس کو رہتا
جس مستی میں ساتھ مرے اس شہر شراب تک آیا وہ

کتنی پیاس اور کتنی مسافت ان آنکھوں میں لکھی تھی
ایک سراب سے نکلا تو اک اور سراب تک آیا وہ

اس کے بعد تو جو کرنا تھا آپ جناب نے کرنا تھا
اس کی تو معراج یہی تھی آپ جناب تک آیا وہ

اس کی خاطر چشم و دل و جاں فرش راہ تو کرنا تجھے
اس جنگل میں خاورؔ مجھ سے خانہ خراب تک آیا وہ