Main ham-nafasan jism hun wo jaan ki tarah tha

main ham-nafasan jism hun wo jaan ki tarah tha
main dard hun wo dard ke unwan ki tarah tha

tu kaun tha kya tha ki baras guzre pa ab bhi
mahsus ye hota hai rag-e-jaan ki tarah tha

jis ke liye kanTa sa chubha karta tha dil mein
pahlu mein wo aaya to gulistan ki tarah tha

ek umr ulajhta raha duniya ki hawa se
kya main bhi tere kakul-e-pechan ki tarah tha

jina to ghazab hai magar ai umr ajab hai
tujh ko to KHabar hai wo meri jaan ki tarah tha

ai raat ke andhiyare mein jage hue lamho!
DhunDo use wo KHwab-e-pareshan ki tarah tha

miTTi ko yahan panw pakaDna nahin aata
main shahr mein bhi gard ke tufan ki tarah tha

lo harf-e-ghazal ban ke numayan hua 'baqar'
kal ramz-sifat mani-e-pinhan ki tarah tha