لے اڑے گیسو پریشانی مری
آئنے لے بھاگے حیرانی مری
کہہ اٹھا جوبن کہ بس بس ہو چکی
نیچی نظروں سے نگہبانی مری
بام پر کہہ آئے جا کر آہ گرم
بڑھ کے بجلی سے ہے جولانی مری
گیسوؤں سے ان کے اچھی غم کی رات
میں فدا اس پر وہ دیوانی مری
پیارے پیارے منہ سے پھر کہہ دے ذرا
ہو مبارک تجھ کو مہمانی مری
ساتھ میرے دل بھی مٹی ہو چکا
تیرے صدقے خاک کیوں چھانی مری
اتنی مدت میں بچھڑ کر دل ملا
دیر تک صورت نہ پہچانی مری
تھک گئے وہ رک گیا خنجر ریاضؔ
اب بڑی مشکل ہے آسانی مری
غزل
لے اڑے گیسو پریشانی مری
ریاضؔ خیرآبادی