lahu ki aanch jaisa ho raha hai
tumhaara gham sitara ho raha hai
ye kaun aaya hai baam-e-arzu par
fazaon mein ujala ho raha hai
jhaDi hai dhul kis ke naqsh-e-pa se
bahut aasan rasta ho raha hai
sikuDti ja rahi hai mujh pe dharti
badan mera kushada ho raha hai
meri palkon pe ek mauhum aansu
ki shabnam se sharara ho raha hai
samajhti hai yahi duniya ki mujh ko
mohabbat mein KHasara ho raha hai
asa jab se 'nabil' aaya mayassar
samundar bhi kinara ho raha hai
Ghazal
Lahu ki aanch jaisa ho raha hai
Nabeel Ahmad Nabeel