laghzish pa-e-hosh ka harf-e-jawaz le ke hum
KHud ko samajhne aae hain ruh-e-majaz le ke hum
karb ke ek lamhe mein lakh baras guzar gae
malik-e-hashr kya karen umr-e-daraaz le ke hum
sham ki dhundli chhanw mein phaile hain sae dar ke
sajda karen ki aae hain zauq-e-namaz le ke hum
dur ufuq pe ja kahin donon lakiren mil gain
aae to the huzur-e-dil naz-o-niyaz le ke hum
raat Dhali hai chand gum dur jale hain do diye
raaz to hai pa kis ke pas jaen ye raaz le ke hum
raqs-e-sharar mein kho gae barq ke dil se mil gae
lala-o-gul mein khil gae maut ka raaz le ke hum
ru-e-suKHan badal gaya baDhne lage hain fasle
aah-e-sukut munjamid baiThe hain saz le ke hum
Ghazal
Laghzish pa-e-hosh ka harf-e-jawaz le ke hum
Shamsur Rahman Faruqi